मलकापूर (प्रतिनिधी) : आषाढी एकादशीचे पावन औचित्य साधून शुक्रवार, दि. २४ जुलै २०२६ रोजी आदर्श प्राथमिक विद्यालय, मलकापूर येथे पारंपरिक वारकरी संस्कृतीचा जागर करणारा भव्य, भक्तिमय आणि संस्कारमय दिंडी सोहळा उत्साहात संपन्न झाला. या दिंडी सोहळ्यात तब्बल ६०० विद्यार्थ्यांनी उत्स्फूर्त सहभाग घेत संपूर्ण मलकापूर नगरी विठ्ठलभक्तीच्या रंगात रंगून गेली.या दिंडी सोहळ्याला गटशिक्षणाधिकारी मा. श्री. फाळके साहेब यांची विशेष उपस्थिती होती . यावेळी विद्यालयाचे मुख्याध्यापक श्री. चव्हाण सर तसेच पंचायत समितीचे श्री. अक्षय नारखेडे हेही उपस्थित होते.कार्यक्रमाच्या प्रारंभी मान्यवरांच्या हस्ते भगवान श्री विठ्ठल-रुक्मिणी यांच्या प्रतिमेचे तसेच संतश्रेष्ठ संत ज्ञानेश्वर महाराज, संत नामदेव महाराज, संत एकनाथ महाराज आणि संत मुक्ताबाई यांच्या प्रतिमांचे विधिवत पूजन करण्यात आले. टाळ-मृदुंगाच्या निनादात आणि "ज्ञानोबा-तुकाराम", "पांडुरंग हरी" या अखंड नामगजरात संपूर्ण परिसर भक्तिमय वातावरणाने भारावून गेला.याप्रसंगी मार्गदर्शन करताना मा. श्री. फाळके साहेब यांनी विद्यार्थ्यांचे मनापासून कौतुक केले. भारतीय संस्कृती, वारकरी संप्रदाय आणि संतपरंपरेतील विचार विद्यार्थ्यांच्या बालमनात रुजविण्यासाठी अशा उपक्रमांची नितांत आवश्यकता असल्याचे त्यांनी सांगितले. शिक्षणाबरोबरच संस्कार, भक्ती, शिस्त आणि सामाजिक ऐक्य यांचे धडे देणारा हा उपक्रम अत्यंत स्तुत्य असल्याचे त्यांनी नमूद केले.त्यानंतर पारंपरिक वारकरी वेशभूषेत सजलेले ६०० विद्यार्थी टाळ, मृदुंग, भगव्या पताका आणि विठ्ठल-रुक्मिणींच्या पालखीसह दिंडीत सहभागी झाले. "विठ्ठल... विठ्ठल...", "ज्ञानोबा-तुकाराम" आणि "पुंडलिक वरदा हरी विठ्ठल" या जयघोषात विद्यार्थ्यांनी पावल्या खेळत संपूर्ण मलकापूर शहरातून दिंडी काढली. दिंडीचे दर्शन घेण्यासाठी नागरिकांनी रस्त्यांच्या दुतर्फा मोठी गर्दी केली होती. अनेक भाविकांनी विठ्ठल-रुक्मिणींची पूजा करून दिंडीचे स्वागत केले, विद्यार्थ्यांवर पुष्पवृष्टी केली आणि भक्तिभावाने विठूनामाचा गजर केला.विद्यार्थ्यांच्या निरागस भक्तीने, संतांच्या अभंगांनी आणि विठ्ठलनामाच्या अखंड गजराने संपूर्ण मलकापूर नगरी जणू पंढरीची अनुभूती देत होती. वारकरी परंपरेचा जिवंत वारसा जपत भारतीय संस्कृतीची ओळख नव्या पिढीपर्यंत पोहोचविणारा हा दिंडी सोहळा धार्मिक, सांस्कृतिक आणि शैक्षणिक दृष्ट्याही अत्यंत प्रेरणादायी ठरला.६०० विद्यार्थ्यांचा उत्स्फूर्त सहभाग, शिक्षकांचे परिश्रम, पालकांचे सहकार्य आणि नागरिकांचा उत्साह यामुळे हा दिंडी सोहळा अविस्मरणीय ठरला. विठ्ठलभक्ती, संतविचार आणि संस्कारांचा संदेश देणारा हा सोहळा उपस्थितांच्या मनात कायमचा घर करून गेला.
إرسال تعليق